Churches of the Day

CÉAD LÉACHT       

Sliocht as Leabhar  Gníomhartha na nAspal            5:17-26
Na fir úd a chuir sibh i bpríosún, tá siad ina seasamh sa Teampall ag teagasc an phobail.

Ansin chuir an t-ardsagart chun oibre, é féin agus a pháirtithe go léir d’aicme na Sadúcach. Le teann éada rinne said na haspail a ghabháil agus a chur sa phríosún poiblí.



Ach i rith na hoíche d’oscail aingeal an Tiarna geataí an phríosúin agus lig amach iad, á rá leo 'imeacht agus seasamh sa Teampall agus faisnéis iomlán a thabhairt don phobal ar an mbeatha seo.' Rinne siad rud air: chuaigh siad isteach sa Teampall le breacadh an lae agus chrom ar theagasc.

Tháinig an t-ardsagart agus a bhuíon, thionóil siad an tsainidrín – is é sin, seanad iomlán chlann Iosrael – agus chuir siad scéala chun an phríosúin na haspail a thabhairt i láthair. Ach nuair a shroich na feidhmeannaigh an príosún ní bhfuair siad ann iad, agus ar dhul ar ais dóibh, d’inis siad an scéal:
“Fuaireamar an príosún go daingean faoi ghlas,” ar siad, “bhí gardaí ina seasamh ag na geataí ach ar oscailt na ngeataí dúinn, ní bhfuaireamar duine ar bith istigh.”
Nuair a chuala ceannfort an Teampaill agus na hardsagairt an scéal seo, ní fhéadfaidís a thuiscint cad a bhí tite amach dóibh. Leis sin tháinig duine ar an láthair le scéala:
“Feach,” ar seisean, “na fir úd a chuir sibh i bpríosún, tá siad ina seasamh sa Teampall ag teagasc an phobail.”
Ansin d’imigh an ceannfort agus a chuid giollaí agus thug siad leo iad, gan aon lámh láidir, áfach, mar bhí eagla orthu roimh an bpobal, go gclochfaidís iad.

Briathar an Tiarna                  Buíochas le Dia

Salm le Freagra                   Sm 33
Freagra                                    Nuair a scairt an t-ainniseoir seo d’éist an Tiarna.
Malairt Freagra                  Alleluia

1. Beannóidh mé an Tiarna i dtólamh beidh a mholadh i mo bhéal i gcónaí.
Bíonn m’anam ag déanamh mórtais as an Tiarna: éistfidh daoine ísle agus beidh áthas orthu.      Freagra

2.  Móraigí an Tiarna mar aon liom: tugaimis adhradh dá ainm in éineacht.
Bhí mé ag lorg an Tiarna agus d’éist sé liom agus d’fhuascail sé ó m’eagla go léir mé.                       Freagra

3. Féachaigí chuige agus loinnir oraibh ’s na bíodh luisne na náire in bhur leicne.
Nuair a scairt an t-ainniseoir seo d’éist an Tiarna, agus shaor sé óna chúngaigh go léir é.                Freagra

4. Bíonn aingeal an Tiarna i gcampa thart ar lucht a eaglaithe, á bhfuascailt.
Blaisigí is féachaigí a fheabhas atá an Tiarna: is aoibhinn dá dtagann faoina dhídean.                     Freagra

SOISCÉAL                

Sliocht as an Soiscéal naofa de réir Naomh Eoin        3:16-21
Chuir Dia a Mhac uaidh ar an saol  chun go slánófaí an saol tríd.

San am sin dúirt Íosa le Nícodémas:
Óir ghráigh Dia an domhan chomh mór sin gur thug sé a Aonghin Mic uaidh i dtreo,
gach duine a chreideann ann,nach gcaillfí é ach go mbeadh an bheatha shioraí aige.
Óir ní chun daorbhreith a thabhairt ar an saol
a chuir Dia a Mhac uaidh ar an saol ach chun go slánófaí an saol tríd.
An té a chreideann ann ní thabharfar daorbhreith air,
ach an té nach gcreideann ann, tá daorbhreith tugtha air cheana féin,
mar nár chreid sé in ainm Mhac Dé, a Aonghin.
Agus an daorbhreith, is mar seo í: mar gur tháinig an solas isteach sa saol, agus gur rogha leis na daoine an dorchadas thar an solas de bhrí gurbh olc iad a ngníomhartha.

Óir gach duine a bhíonn ag déanamh an oilc,
bíonn fuath aige don solas agus seachnaíonn sé an solas, le heagla go gcáinfí a ghníomhartha.
Ach an té a dhéanann an fhírinne, tagann sé chun an tsolais, chun go dtaispeáinfí gur i nDia a rinneadh a ghníomhartha.”

Soiscéal an Tiarna.         Moladh duit, a Chriost



AN BÍOBLA NAOFA
© An Sagart

CÉAD LÉACHT         

Sliocht as Gníomhartha na nAspal              5:27-32. 40-41
Is finnéithe ar na nithe sin sinne agus an Spiorad Naomh.

Cheistigh an t-ardsagart iad:
“Thugamar ordú daingean daoibh,” ar seisean, “gan teagasc a dhéanamh in ainm an duine seo, ach féach, tá Iarúsailéim líonta de bhur dteagasc agaibh. Agus is áil libh bás an duine seo a leagan orainne.”
D’fhreagair Peadar agus na haspail eile:
“Is córa dúinn umhlú do Dhia ná do dhaoine. Thóg Dia ár sinsear Íosa ó mhairbh tar éis daoibhse é a mharú, á chrochadh ar chrann. D’ardaigh Dia ar a dheis féin é ina phrionsa agus ina shlánaitheoir chun aithrí agus maithiúnas peacaí a thabhairt d’Iosrael. Is finnéithe ar na nithe sin sinne agus an Spiorad Naomh ar thug Dia é dóibh sin atá umhal dó.”
Chuir siad fios ar na haspail agus tar éis dóibh iad a sciúrsáil agus foláireamh a thabhairt dóibh gan labhairt in ainm Íosa, scaoil siad chun siúil iad.

D’imigh siadsan leo ó láthair na sainidríne agus áthas orthu de chionn go mba fhiú le Dia iad tarcaisne a fhulaingt ar son ainm Íosa.

Briathar an Tiarna                       Buíochas le Dia

Salm Le Freagra             Sm 29
Freagra :                            Molfaidh mé thú, a Thiarna, de bhrí gur shaor tú mé.
Malairt Freagra :          Alleluia!

I. Molfaidh mé thú, a Thiarna, de bhrí gur shaor tú mé, is nár thug tú do mo naimhde gairdeas a dhéanamh umam.
A Thiarna, threoraigh tú m'anam amach as ifreann, is dhealaigh tú mé ón dream a théann síos san uaimh.       Freagra

2. A naomha, abraigí dánta molta don Tiarna is tugaigí buíochas dá ainm naofa.
Óir ní mhaireann a fhearg ach nóiméad, ach maireann a chineáltas ó aois go bás.
Tig an gol um thráthnóna, is an gáire arís ar maidin.                                                                                                          Freagra 

3. Éist liom, a Thiarna, is déan trócaire orm; a Thiarna, bí mar chabhair dom.
Rinne tú rince de m'olagón; a Thiarna, mo Dhia, molfaidh mé thú go brách.                                                                 Freagra 

DARA LÉACHT            Apacailipsis 5:11-14
Is fiú é an tUan arna bhású, é a fháil cumhachta, agus saibhris

Ansin san fhís dom, chuala mé glór iliomad aingeal timpeall na ríchathaoireach agus na ndúl beo, agus na seanóirí, ba é a líon deich míle faoi dheich míle agus na mílte ar mhílte. Agus is é a bhí á rá acu de ghlór ard:
“Is fiú é an tUan arna bhású, é a fháil cumhachta, agus saibhris, agus eagna, agus nirt, agus onóra, agus glóire, agus molta.”
Ansin, an uile chréatúr sna flaithis, agus ar talamh, agus faoi thalamh, agus san fharraige, chuala mé iad go léir sna baill sin, á rá: “Go raibh moladh agus onóir agus glóir agus cumhacht don té atá ina shuí sa ríchathaoir agus don Uan ar feadh na síoraíochta.”
Agus dúirt na ceithre dúile: “Amen.”  Agus shléacht na seanóirí agus rinne siad adhradh.

Briathar an Tiarna                 Buíochas le Dia

Alleluia Véarsa                 Lc 24: 32
Alleluia, Alleluia!
A Thiaina Íosa, nocht na scrioptúir dúinn; cuir ár gcroí ar Iasadh ionainn
Ie linn duit bheith ag labhairt linn.
Alleluia!

SOISCÉAL

Go raibh an Tiarna libh.            Agus le do spiorad féin
Sliocht as Soiscéal naofa de réir Naomh Eoin          21:1-19        Glóir duit, a Thiarna.
Tháinig Íosa agus thóg an t-arán agus thug dóibh é, agus mar an gcéanna leis an iasc.

San am sin thaispeáin Íosa é féin arís do na deisceabail ag Muir Thibirias, agus seo mar a thaispeáin:
Bhí i bhfochair a chéile: Síomón Peadar, Tomás an Leathchúpla, Natanael ó Chána na Gailíle, agus clann Zeibidé, agus beirt eile dá dheisceabail.
Dúirt Síomón Peadar leo: “Táimse ag dul ag iascach.” “Rachaimidne leat,” ar siad.
D’imigh siad mar sin agus isteach sa bhád leo, ach an oíche sin níor rug siad ar bhreac.

Nuair a tháinig an mhaidin, bhí Íosa ina sheasamh ar an trá, ach ní raibh a fhios ag a dheisceabail gurbh é Íosa é.
Dúirt Íosa leo: “Níl aon iasc agaibh, an bhfuil, a chlann ó?”
“Níl,” ar siad á fhreagairt.
Dúirt sé leo: “Cuirigí an eangach amach ar dheis na loinge, agus sibh iasc.”

Rinne siad cor dá bhrí sin agus láithreach bhí ag teip orthu an eangach a tharraingt, bhí an oiread sin iasc inti.
Ansin an deisceabal ab ionúin le Íosa, dúirt sé le Peadar: “Is é an Tiarna é.”
Nuair a chuala Peadar dá bhrí sin gurbh é an Tiarna é, chuir sé a bhrat uime – mar bhí sé gan é – agus chaith sé é féin isteach san fharraige. Ach tháinig na deisceabail eile sa long mar níorbh fhada ón talamh iad, ach timpeall dhá chéad banlámh; agus tharraing siad an eangach lán d’iasc ina ndiaidh.

Nuair a tháinig siad i dtír mar sin, chonaic siad arán ansiúd agus tine ghualaigh agus iasc uirthi.
Dúirt Íosa leo: “Tugaigí anseo cuid de na héisc a ghabh sibh anois.”
Ansin chuaigh Peadar ar bord agus tharraing sé an eangach i dtír, agus í lán d’éisc mhóra, céad agus caoga a trí díobh; agus bíodh go raibh siad chomh mór sin níor bhris an eangach.

Dúirt Íosa leo: “Tagaigí agus ithigí.”
Ní raibh sé de mhisneach ag aon duine de na deisceabail a fhiafraí de: “Cé hé thú féin?” mar go raibh fhios acu gurbh é an Tiarna é. Tháinig Íosa agus thóg an t-arán agus thug dóibh é, agus mar an gcéanna leis an iasc.
Is é sin anois an tríú huair a thaispeáin Íosa é féin do na deisceabail tar éis do aiséirí ó mhairbh.

Nuair a bhí bia caite acu dúirt Íosa le Síomón Peadar:
“A Shíomóin mhic Eoin, an mó do chion-sa orm ná a gcion seo?”
“Sea, a Thiarna,” ar seisean leis, “is eol duit go bhfuil grá agam duit.”
Dúirt Íosa leis: “Déan m’uain a chothú.”

Dúirt sé leis an dara huair: “A Shíomóin mhic Eoin, an bhfuil cion agat orm?”
“Tá, a Thiarna,” ar seisean leis, “tá a fhios agat go bhfuil grá agam duit.”
Dúirt sé leis: “Déan mo chaoirigh a aoireacht.”

Dúirt sé leis an tríú huair: “A Shíomóin mhic Eoin, an bhfuil grá agat dom?”
Tháinig buairt ar Pheadar mar go ndúirt sé leis an tríú huair: “An bhfuil grá agat dom?”
Agus dúirt sé leis: “A Thiarna, tá fios gach ní agat. Tá a fhios agat go bhfuil grá agam duit.”
Dúirt Íosa leis: “Déan mo chaoirigh a chothú.”
“Amen, Amen, a deirim leat. Nuair a bhí tú níos óige, chuirteá féin do chrios umat, agus shiúltá san áit ba thoil leat; ach nuair a thiocfaidh an aois ort, sínfidh tú amach do lámha, agus cuirfidh duine eile do chrios umat, agus seolfaidh sé thú san áit nach toil leat.”

Dúirt sé an méid sin lena chur in iúl cad é an sort báis lena dtabharfadh sé glóir do Dhia.

Agus nuair a bhí an méid sin ráite aige dúirt sé: “Lean mise.”

Soiscéal an Tiarna.           Moladh duit, a Chriost

_________________________

SOISCÉAL gearr

Go raibh an Tiarna libh.            Agus le do spiorad féin
Sliocht as Soiscéal naofa de réir Naomh Eoin          21:1-19        Glóir duit, a Thiarna.
Tháinig Íosa agus thóg an t-arán agus thug dóibh é, agus mar an gcéanna leis an iasc.

San am sin thaispeáin Íosa é féin arís do na deisceabail ag Muir Thibirias, agus seo mar a thaispeáin:
Bhí i bhfochair a chéile: Síomón Peadar, Tomás an Leathchúpla, Natanael ó Chána na Gailíle, agus clann Zeibidé, agus beirt eile dá dheisceabail.
Dúirt Síomón Peadar leo: “Táimse ag dul ag iascach.” “Rachaimidne leat,” ar siad.
D’imigh siad mar sin agus isteach sa bhád leo, ach an oíche sin níor rug siad ar bhreac.

Nuair a tháinig an mhaidin, bhí Íosa ina sheasamh ar an trá, ach ní raibh a fhios ag a dheisceabail gurbh é Íosa é.
Dúirt Íosa leo: “Níl aon iasc agaibh, an bhfuil, a chlann ó?”
“Níl,” ar siad á fhreagairt.
Dúirt sé leo: “Cuirigí an eangach amach ar dheis na loinge, agus sibh iasc.”

Rinne siad cor dá bhrí sin agus láithreach bhí ag teip orthu an eangach a tharraingt, bhí an oiread sin iasc inti.
Ansin an deisceabal ab ionúin le Íosa, dúirt sé le Peadar: “Is é an Tiarna é.”
Nuair a chuala Peadar dá bhrí sin gurbh é an Tiarna é, chuir sé a bhrat uime – mar bhí sé gan é – agus chaith sé é féin isteach san fharraige. Ach tháinig na deisceabail eile sa long mar níorbh fhada ón talamh iad, ach timpeall dhá chéad banlámh; agus tharraing siad an eangach lán d’iasc ina ndiaidh.

Nuair a tháinig siad i dtír mar sin, chonaic siad arán ansiúd agus tine ghualaigh agus iasc uirthi.
Dúirt Íosa leo: “Tugaigí anseo cuid de na héisc a ghabh sibh anois.”
Ansin chuaigh Peadar ar bord agus tharraing sé an eangach i dtír, agus í lán d’éisc mhóra, céad agus caoga a trí díobh;
agus bíodh go raibh siad chomh mór sin níor bhris an eangach.

Dúirt Íosa leo: “Tagaigí agus ithigí.”
Ní raibh sé de mhisneach ag aon duine de na deisceabail a fhiafraí de: “Cé hé thú féin?” mar go raibh fhios acu gurbh é an Tiarna é.
Tháinig Íosa agus thóg an t-arán agus thug dóibh é, agus mar an gcéanna leis an iasc.
Is é sin anois an tríú huair a thaispeáin Íosa é féin do na deisceabail tar éis do aiséirí ó mhairbh.



AN BÍOBLA NAOFA
© An Sagart